РАЙОНДО ДАН ОРУП-ЖЫЙНОО КЫЗУУ ЖҮРҮП ЖАТАТ

Базар-Коргон районунун айыл аймактарында кылкандуу дан эгиндерин оруп-жыюу иштери кызуу жүрүп жатат. Азыркыга чейин бардык аянттагы буудайдын жана арпанын жарымынан көбү жыйналып, кырманга жеткирилди. Бул тууралуу райондук агрардык өнүктүрүү департаментинин башчысы Авазбек Палванов билдирди.

Алынган маалымат боюнча, быйылкы жыйнала турган буудай аянттары 2537 гектарды түзсө, анын 1547 гектары кайракы жана 990 гектары гана сугат аянттары эсептелет. Ал эми 2-июлга карата жалпы аянттын 1257 гектары оруп-жыйналган, демек, дээрлик жарымы бүттү. Салыштыра келсек, өткөн жылы ушул кезге чейин 906 гектар аянт оруп-жыйналган болчу.

-Быйылкы аракеттерге жараша жыйналган түшүмдүн дүң жыйымы да былтыркыдан көп. Мисалы, быйыл 2-июлга карата 4004 тонна буудай жыйналса, өткөн жылдын ушул кезинде 3394 тонна жыйналган эле. Быйыл 610 тоннага көп болду, - дейт А. Палванов.

Учурда буудай талааларында 10 комбайн иштеп жатат, алардын үчөөсү сырттан жардамга келгендер. Өткөн жылы ушул кезде буудай талааларында 8 комбайн иштеген.

Райондун аймагында арпа жыйноо иши да ушундай эле кызуу темп менен жүрүп жатат. Бардык жыйналуучу аянт 2485 гектарды түзсө, анын 2473 гектары кайракы, ал эми 12 гектары сугат аянттары эсептелет. Июлдун 2сине карата 1366 гектар аянт оруп-жыйналды жана бул өткөн жылдын ушул кездегисинен 371 гектарга көптүк кылат.

-Арпанын түшүмдүүлүгү былтыркыдай эле болуп жатат. Башкача айтканда, өткөн жылдын ушул маалында ар гектарынан 26 центнерден түшүм алынган болчу. Быйылкы көрсөткүч да ушундай болууда. Эми орум-жыйым өнөктүгүнүн жыйынтыгында кандай болорун турмуш көпрсөтөт, бирок былтыркыдан аз болбойт деп ишенип турабыз, - дейт А. Палванов.

Ошентип, арпанын азыркы учурда жыйналган дүң жыйымы да бекерелүү болууда, анткени 2 июлга карата 2884 тонна арпа даны жыйналса, бул өткөн жылдын ушул кездегисине салыштырмалуу 304 тоннага көптүк кылат. Бүгүнкү күндө эгин талааларында 11 комбайн тынымсыз иштеп жатат, өткөн жылы 10 комбайн иштетилген болчу.

Учурда райондун дыйкандары жетилген түшүмдү батыраак коромсуз жыйнап алуу аракетинде.